yasmeen-hameed

Wo Lamha Kaisa Hota Hai

jo bar-avar nahin hota

vo lamha kaisa hota hai

jo rang-o-khusbuon ke abgine tod deta hai

jo yadon ki khuli ankhon ko

apne sard hathon ke asar se muund deta hai

jo din ki raushni men shab ki amezish se

aisi saaten takhliq karta hai

jo asuda hi hoti hain na afsurda hi hoti hain

kabhi hansti kabhi be-tarah roti hain

jo rasta khojti aur manzilon ko bhuul jaati hain

jo zinda hain na marti hain

jo Darti hain ada-e-vaqt se

rukti na chalti hain

fasil-e-be-yaqini par rakhi

shamon ki surat

aas men bujhti na jalti hain

jo aisi saaten takhliq karta hai

vo lamha kaisa hota hai

kisi padash ki takmil ka hissa

ki harf-e-katib-e-taqdir hota hai

More Poems

Leave a Comment