Ahmad Rahi
tanhaiyon ke dasht men akasr mila mujhe
vo shakhs jis ne kar diya mujh se juda mujhe
varaftagi miri hai ki hai intiha-e-shauq
us ki gali ko le gaya har rasta mujhe
jaise ho koi chehra naya us ke ru-ba-ru
yuun dekhta raha mira har ashna mujhe
harf-e-ghalat samajh ke jo mujh ko mita gaya
us jaisa us ke baad na koi laga mujhe
pahle hi mujh pe kam nahin teri inayaten
dam lene de ai gardish-e-dauran zara mujhe
mushkil mujhe dubna kinare pe bhi na tha
nahaq bhanvar men laaya mira nakhuda mujhe
ye zindagi ki maut bhi hai jis pe nauha-khvan
kis jurm ki na jaane mili hai saza mujhe
Leave a Reply