kisi qalam se kisi ki zaban se chalta huun
main tiir kis ka huun kis ki kaman se chalta huun
main thak gaya huun Thahar kar kisi samundar sa
ba-rang-e-abr tire astan se chalta huun
tu chhoḌ dega adhura mujhe kahani men
isi liye main tiri dastan se chalta huun
jo mere siine ke baa.en taraf dhaḌakta hai
usi ke naqsh-e-qadam par vahan se chalta huun
yahan se chalne ka matlab to aur hai lekin
main thak chuka huun miri jaan yahan se chalta huun
ab agar chahe to logon ke beach le aana
main aaj apne tire darmiyan se chalta huun
na jaane kaise safar men huun mubtala ‘fayyaz’
vahin pe aata huun vapas jahan se chalta huun
Leave a Reply