akhilesh-tiwari

Mulahiza Ho Meri Bhi Udan Pinjre Mein

mulahiza ho miri bhi uḌaan pinjre men

ata hue hain mujhe do-jahan pinjre men

hai sair-gah bhi aur is men ab-o-dana bhi

rakha gaya hai mira kitna dhyan pinjre men

is ek shart par us ne riha kiya mujh ko

rakhega rehn vo meri uḌaan pinjre men

yahin halak hua hai parinda ḳhvahish ka

tabhi to hain ye lahu ke nishan pinjre men

mujhe sataega tanhaiyon ka mausam kya

hai mere saath mira ḳhandan pinjre men

falak pe jab bhi parindon ki saf nazar aai

hui hain kitni hi yaden javan pinjre men

ḳhayal aaya hamen bhi ḳhuda ki rahmat ka

sunai jab bhi paḌi hai azaan pinjre men

tarah tarah ke sabaq is liye raTae gae

main bhuul ja.un khula asman pinjre men

More Poems

Leave a Comment