Sameena Raja
tu bhi ruḳhsat ho raha hai dhuup bhi Dhalne ko hai
mere andar ik charagh-e-sham-e-gham jalne ko hai
kab talak is hijr men aḳhir ko rona chahiye
aankh bhi ḳhuun ho ga.i daman bhi ab galne ko hai
gulsitan men paḌ ga.i hai rasm-e-tajsim-e-bahar
apne chehre par har ik gul ḳhun-e-dil malne ko hai
ajnabi si sarzamin na-ashna se log hain
ek suraj tha shanasa vo bhi ab Dhalne ko hai
har na.i manzil ki janib surat-e-abr-e-ravan
mere hathon se nikal kar mera dil chalne ko hai
shahr par tufan se pahle ka sannaTa hai aaj
hadisa hone ko hai ya saneha Talne ko hai
ik hava-e-tund aur hamrah kuchh chingariyan
ḳhaak si uḌne ko hai aur aag si jalne ko hai
samne hai niind ki lambi masafat aaj shab
karvan-e-anjum-o-mahtab bhi chalne ko hai
Leave a Reply