Chaman Walon Ko Raqsan-O-Ghazal-KHwan Le Ke uTThi Hai

Suroor Barabankvi

chaman valon ko raqsan-o-ghazal-ḳhvan le ke uTThi hai

saba ik ik se ta.id-e-baharan le ke uTThi hai

ruḳh-e-gul-e-rang par ik shabnamistan le ke uTThi hai

ye kya aalam tiri chashm-e-pasheman le ke uTThi hai

ye kis daman ki hasrat hashm-e-giryan le ke uTThi hai

ki dil se jo bhi mauj uTThi hai tufan le ke uTThi

giranbari se shana ḳham hua jaata hai hasti ka

na jaane zindagi kis kis ka ehsan le ke uTThi hai

‘surur’ us bazm ke sadqe jahan par dil ki betabi

fasurda le ke aa.i thi ghazal-ḳhvan le ke uTThi hai