Aankhon Se Pare Nind Ki Raftar Mein Rahna

Sarmad Sahbai

ankhon se pare niind ki raftar men rahna

har pal kisi na-did ke didar men rahna

kho jaana use dekh ke uryan ke safar men

chhute hi use hajla-e-asrar men rahna

ik ḳhvab-e-darida ko rag-e-harf se sena

phir le ke use kucha-o-bazar men rahna

ḳhud apne ko hi dekh ke hairan sa hona

nargis ki tarah mausam-e-bimar men rahna

marna yunhi abresham-o-kam-ḳhvab havas men

dam toḌ ke zinda kabhi divar men rahna

hasrat si liye ḳhilqat-e-ma.asum men phirna

sazish ki tarah gardish-e-darbar men rahna

hai baḳht sitaron ka un ankhon men chamakna

aur gul ka muqaddar lab-o-ruḳhsar men rahna

raunaq si liye shahar ke raston par bikharna

tanha.i ki surat dar-o-divar men rahna

‘sarmad’ tapish-e-nar-e-suḳhan men huun ki mujh ko

gul karta raha sho.ala-o-angar men rahna