Adeem Hashmi
logon ke dard apni pashemaniyan milin
ham shah-e-gham the ham ko yahi raniyan milin
sahraon men bhi ja ke nazar aae sail-e-ab
dariya se duur bhi hamen tughyaniyan milin
aaya na phir vo daur ki ji bhar ke kheliye
bachpan ke baad phir na vo nadaniyan milin
rah kar alag bhi saath raha hai koi khayal
tanhai men bhi khud pe nigahbaniyan milin
paani ke saath aks bhi bah kar chale gae
sukhi nadi to phir vahi viraniyan milin
apni hi aankh par gae lamhon ka bojh tha
is ki nazar men to vahi jaulaniyan milin
baitha raha huma-e-sitam sar pe hi ‘adim’
har dasht-e-karb ki hamen sultaniyan milin
Leave a Reply