dastanon men vo jaadu hai na tafsiron men hai
jo tiri ankhon ki be-avaz taqriron men hai
ra.egan hain kal ki ḳhushiyan kal ke gham bhi be-asar
ab bhala rakkha hi kya maazi ki tasviron men hai
teri ankhon men agar paḌhne ki himmat hai to paḌh
karb ka mazmun mire mathe ki tahriron men hai
us ke ik ik ang men vo barha paa.i ga.i
jo tanasub ki kashish tarshe hue hiron men hai
vo chubhan sheron men Dhal jaa.e to mahshar ho bapa
jo abhi us shaḳhs ki guftar ke tiron men hai
har-qadam par chiḳh uThti hai hazaron ghanTiyan
naghmagi kaisi mire paanv ki zanjiron men hai
aankh khulte hi ajab dhaḌka sa dil ko lag gaya
vo kahan sapnon men tha jo un ki ta.abiron men hai
mutma.in hain ham kisi surat na manzar se hain ḳhush
na-shakeba.i ka nashtar apni taqdiron men hai
dhuup ki shiddat ne un ko kar diya garche niDhal
phir bhi chalne ki lagan ‘betab’ rahgiron men hai
Leave a Reply