maal uTha aur dukan ḳhali kar
ye zaman-o-makan ḳhali kar
ja kahin aur kar shikar apna
chhoḌ jangal machan ḳhali kar
ja kinare pe ja ke baiTh kahin
ai hava badban ḳhali kar
ab kisi aur ko bhi baari de
ai parinde uḌaan ḳhali kar
raushni ke liye jagah to bana
raat ka darmiyan ḳhali kar
muntazir hain umid-var na.e
kamra-e-imtihan ḳhali kar
dhuup saari nikal andar se
jism ka sa.eban ḳhali kar
giit ko apni lai men uThne de
sur badal aur taan ḳhali kar
koi achchha suḳhan bhi lab par la
shor-o-shar se zaban ḳhali kar
janib-e-koh chal tayaqqun se
dasht-e-vahm-o-guman ḳhali kar
tez rau hain musafiran-e-adam
raah de pa.edan ḳhali kar
aane vaale dinon ka qissa likh
sun chuki dastan ḳhali kar
gir chuki hain tamam divaren
ab to ‘nasir’ makan ḳhali kar
Leave a Reply