vo mere baare men aise bhi sochta kab tha
agar main aks nahin thi vo aaina kab tha
jo jod deta taalluq ke sab ravabit ko
hamare biich koi aisa silsila kab tha
vo ziina ziina mire dil men yuun utarta gaya
main rok paati use mujh men hausla kab tha
vo khush-guman bahut tha ki main huun us ki magar
ye aarzu thi faqat mera faisla kab tha
vo mere zabt ko har aan azmata raha
main sang-zad huun us ko magar pata kab tha
suna nahin jo kaha tha to kaise samjhate
jo us ne samjha tha mera vo muddaa kab tha
bahar ban ke vo milne to aa gaya tha mujhe
thahar bhi jaega ye us ka faisla kab tha
Leave a Reply