taḳhti qalam davat se pahle ki baat hai
ye ishq ka.enat se pahle ki baat hai
sach hai ki main bhi pyaar ka munkir bana raha
haan haan ye teri zaat se pahle ki baat hai
ab to tire ghalat pe bhi amin kah diya
inkar teri baat se pahle ki baat hai
bas be-sabab furat pe ilzam aa gaya
ye pyaas to furat se pahle ki baat hai
kin ka dahan talash karen mil ke dosto
ye lafz shash-jahat se pahle ki baat hai
main naaz zindagi ke uThata raha baja
par ye miri vafat se pahle ki baat hai
ik karb-e-na-tamam se nikla to ro paḌa
meri ḳhushi najat se pahle ki baat hai
‘kazim’ tha ḳhauf rizq-e-suḳhan men kami na ho
ye ishq ki zakat se pahle ki baat hai
Leave a Reply