kanta sa jo chubha tha vo lau de gaya hai kya
ghulta hua lahu men ye khurshid sa hai kya
palkon ke biich saare ujale simat gae
saaya na saath de ye vahi marhala hai kya
main andhiyon ke paas talash-e-saba men huun
tum mujh se puchhte ho mira hausla hai kya
sagar huun aur mauj ke har daere men huun
sahil pe koi naqsh-e-qadam kho gaya hai kya
sau sau tarah likha to sahi harf-e-arzu
ik harf-e-arzu hi miri intiha hai kya
ik khvab-e-dil-pazir ghani chhanv ki tarah
ye bhi nahin to phir miri zanjir-e-pa hai kya
kya phir kisi ne qarz-e-muravvat ada kiya
kyuun aankh be-saval hai dil phir dukha hai kya
Leave a Reply