ghazal ke shanon pe ḳhvab-e-hasti ba-chashm-e-pur-nam Thahar ga.e hain
ye kis ne chheḌi hai tan-e-mazi rabab-o-sargam Thahar ga.e hain
firaq rut men akela manzil ki justuju men nikal paḌa huun
visal lamhon ke ham-qadam vo qadam dama-dam Thahar ga.e hain
abhi to socha tha teri mahfil men ham na a.enge ab dobara
ye kis sada ka guman hua hai ki yak-ba-yak ham Thahar ga.e hain
vo saath jab tak rahe hamare bahar apne shabab par thi
vo kya ga.e ki dil-o-nazar men udaas mausam Thahar ga.e hain
mohabbaton ke safir ham hain juda hai tarz-e-safar hamara
jahan bhi zikr-e-vafa mila hai vahan pe paiham Thahar ga.e hain
ajal ki kirnon se ham kisi pal bhi ḳhushk hone ke muntazir hain
bahut ghanimat hai chand lamhe jo misl-e-shabnam Thahar ga.e hain
prem-agni men jhulse naina ye puchh baiThe hain aaj phir se
ki barkha rut men sakhi bata tu kahan pe balam Thahar ga.e hain
jahan pe kal tak thi chhanv ‘zakir’ vahin pe Thahri hai dhuup ab ke
ajab sitam hai kahin pe aa kar kahin ke mausam Thahar ga.e hain
Leave a Reply