Muzaffar Iraj
ye kis maqam se aḳhir palaT gaya hai tu
mire habib bata kis jagah chhupa hai tu
hayat aa ke yahan par Thaharne vaali hai
kisi ke paanv ki aahaT pe bolta hai tu
jahan bhi shaam hui mujh ko teri yaad aa.i
shab-e-firaq men sun aḳhiri dua hai tu
guzarta vaqt kahan ḳhud ko bhi chhupa paaya
zamana jis men ayaan hai vo a.ina hai tu
kisi ne dekha kahan vasl ki ghaḌi ka mizaj
hamari jaan pe bani aur hans raha hai tu
kitab-e-qalb pe sud-o-ziyan ki baat na likh
savad-e-dard hai tu dard-e-la-dava hai tu
kabhi jala.e mujhe aur paar utare kabhi
mira ḳhuda bhi hai aur naḳhuda hai tu
tire siva mire zaḳhmon ka indimal nahin
miri ḳhushi se mire gham se ashna hai tu
zamane guzre to ‘iraj’ ne bhi yahi samjha
ki ibtida se juḌi meri intiha hai tu
Leave a Reply