Kumar Pashi
ghera Daale hue hai dushman bachne ke asar kahan
ḳhali haath khaḌe ho ‘pashi’ rakh aa.e talvar kahan
kyuun logon se mehr-o-vafa ki aas laga.e baiThe ho
jhuuT ke is makruh nagar men logon ka kirdar kahan
kya hasrat se dekh rahe hain hamen ye jagmag se sahil
haa.e hamare hathon se bhi chhuTe hain patvar kahan
ḳhatm hua har ḳhvab-e-tamasha raakh hua har shahr-e-sada
dasht hai har su tanha.i ka hue hain ham bedar kahan
duur duur tak koi nahin ab tujhe bacha le jo aa kar
daad to de dushman ko ‘pashi’! kiya hai us ne vaar kahan
Leave a Reply