hayat ki be-rukhi nai hai na apni kam-maegi nai hai
phir aaj jazbat-e-gham ki maujon men kaisi ye bekali nai hai
na jaane harf-e-talab hai nadim ki be-zabani zaban hai apni
dhadak raha hai dil-e-tamanna ki manzil-e-ashiqi nai hai
vahi hai jaada vahi safar hai vahi hai manzar vahi nazar hai
magar ba-andaz-e-ashnai hamari varaftagi nai hai
zaval-e-hasti ke nauha-khvan the koi hamari zaban na samjha
bujhe hain sinon men dil sabhi ke ki apni ashuftagi nai hai
jo harf dil par raqam kiye the vo le uden yaas ki havaen
ab is bayaban-e-arzu men hamari bechargi nai hai
na koi dard-ashna na hamdam na koi soz-e-darun ka mahram
hamen yahan ajnabi hain jaane ki saari duniya nai nai hai
main naqd-e-jan tak luta chuki thi nafas men shoale jala chuki thi
tilism-e-khvab ab kahan se aaya ye manzil-e-be-khudi nai hai
Leave a Reply