Ashfaq Husain
diye jo kar diye gul ahd-e-shab men rahte hue
ye ehtijaj tha hadd-e-adab men rahte hue
har ek baat pe ashk har na.i sahar se gurez
baras guzar ga.e kyuun aur kab men rahte hue
vo log kaun the kis ab-o-gil ka paikar the
jo phuul jaise the dasht-e-ghazab men rahte hue
guzishtagan-e-mohabbat se kuchh hunar le kar
juda sabhi se rahe aur sab men rahte hue
kabhi jo yaad mujhe aa gaya mira bachpan
to aankh nam hui bazm-e-tarab men rahte hue
main apni zaat ki pahchan tak ganva baiTha
ḳhayal-e-izzat-e-nam-o-nasab men rahte hue
hadis-e-dil bhi to main likh nahin saka ‘ashfaq’
hujum-e-halqa-e-sher-o-adab men rahte hue
Leave a Reply