Ahmad Rahi
kabhi hayat ka gham hai kabhi tira gham hai
har ek rang men nakamiyon ka matam hai
khayal tha tire pahlu men kuchh sukun hoga
magar yahan bhi vahi iztirab paiham hai
mire habib miri muskurahaton pe na ja
khuda-gavah mujhe aaj bhi tira gham hai
sahar se rishta-e-ummid bandhne vaale
charagh-e-zist ki lau shaam hi se maddham hai
ye kis maqam pe le aai zindagi ‘rahi’
qadam qadam pe jahan bebasi ka aalam hai
Leave a Reply