fard ko asr ki raftar liye phirti hai
jins ko garmi-e-bazar liye phirti hai
par-e-parvaz se inkar nahin hai lekin
kijiye ghaur to minqar liye phirti hai
us ki qismat men rasa.i na sahi ashiq ko
hasrat-e-lazzat-e-iz.har liye phirti hai
talib-e-ilm ko idrak-e-fazilat ke baja.e
ḳhvahish-e-turra-o-dastar liye phirti hai
donon Tangon ka ishara hai ki gardish ham ko
har taraf surat-e-parkar liye phirti hai
ek lamhe ke liye bhi nahin milta hai sukun
gardish-e-gumbad-e-davvar liye phirti hai
hathkaḌi jaise lagate hain asiron ko vo zulf
kar ke halqe men giraftar liye phirti hai
tauf men fart-e-tarab se hai zamin charḳh-e-zanan
saya-e-gesu-o-ruḳhsar liye phirti hai
jism ke bojh ko aghaz se anjam talak
garche hai ruuh giran-bar liye phirti hai
is ko Thahra.e hue qasr-e-baqa ki buniyad
zindagi saans ka ik taar liye phirti hai
Leave a Reply