Poet
na dekha jama-e-ḳhud-raftagi utaar ke bhi
chali ga.iin tiri yaden mujhe pukar ke bhi
ye zindagi hai use talḳh tursh hona hai
sa.ubaton ke zara dekh din guzar ke bhi
habab-e-zist na dast-e-qaza se TuuT saka
hayat baaqi rahi qabr men utaar ke bhi
tire ghurur ke hai ru-ba-ru ye ḳhush-shikani
jhuka ke sar na hue pesh shahryar ke bhi
badi na roken pe nafrat to kar hi lete hain
muzahire hain ye kuchh apne iḳhtiyar ke bhi
kabhi gale bhi milo aa ke shaḳh-e-gul ki tarah
ada to kar diye haq ham ne intizar ke bhi
qubul o rad ke sabhi iḳhtiyar us ke the
magar main ḳhush tha tamanna ko us pe vaar ke bhi
bahar ho to lahu men utarti hai ‘shahid’
hamen to chhu ke na guzre ye din bahar ke bhi
Leave a Reply