Rasheed Qaisrani
ghumbad-e-zat men ab koi sada duun to chalun
apne so.e hue sathi ko jaga luun to chalun
phir bikhar ja.unga main raah men zarron ki tarah
koi paiman-e-vafa ḳhud se main bandhun to chalun
jaane tu kaun hai kis samt bulata hai mujhe
teri avaz ki parchha.in ko chhu luun to chalun
bujh na jaa.en tire jalvon ke muqaddas fanus
apne bhige hue daman ko nichoḌun to chalun
kitna gambhir hai kohram sukut-e-shab ka
koi avaz ka paikar kahin dekhun to chalun
dosh-e-tufan se koi mauj bulati hai mujhe
reza reza hai badan ab use chun luun to chalun
kitni sadiyon ki masafat abhi baaqi hai ‘rashid’
hanpte jism ka ye ḳhol utarun to chalun
Leave a Reply