Chandrabhan Khayal
milta nahin ḳhud apne qadam ka nishan mujhe
kin marhalon men chhoḌ gaya karvan mujhe
lamhe ka lams phail chuka ka.enat par
avaz dene aa.i hain ab duriyan mujhe
ik jast men tamam huiin saari vus.aten
la ab na.i zamin naya asman mujhe
aaj ek dasht-vasht men tanha shajar bhi main
hairat se takte hain sabhi karvan mujhe
jangal ki aag phail ga.i saare sahn men
le jaa.e ab junun na jaane kahan mujhe
saare tilism TuuT ga.e ishtiyaq ke
vo raah men mile jo kabhi na-gahan mujhe
taḳhliq-e-sher jehd-e-musalsal vo ḳhana-zad
ek ek lafz dar pe mahaz-e-garan mujhe
Leave a Reply