Suhaib Farooqui
kisi se pyaar kar le ya kisi se pyaar ho jaa.e
yahi azar hai to phir mujhe azar ho jaa.e
rasile honT gadraya badan aur chashm-e-ḳhvabida
koi dekhe use to be-piye sarshar ho jaa.e
yahi azadi-e-iz.har ka matlab hai kya logo
zaban tirshul ho jaa.e qalam talvar ho jaa.e
yahi rasm-e-mohabbat hai isi men lutf aata hai
kabhi inkar ho jaa.e kabhi iqrar ho jaa.e
munafiq ka yahi tarz-e-amal pahchan hai us ki
kabhi is paar ho jaa.e kabhi us paar ho jaa.e
tabassum us ke honTon ka baharon ki amanat hai
vo hans de to bayaban bhi gul-o-gulzar ho jaa.e
main apna istighasa le ke ja.un kis adalat men
agar dil hi asir-e-gesu-e-ḳham-dar ho jaa.e
mata-e-dil ke luTne ka gila kis se karen ja kar
koi qazzaq hi jab qafila-salar ho jaa.e
‘suhaib’ apni duaon men yahi ik vird karta hai
jo insan hain unhen insaniyat se pyaar ho jaa.e
Leave a Reply