kishwar-naheed

Diwar-O-Dar Mein Gham Ka Tamasha To Hai Abhi

divar-o-dar men gham ka tamasha to hai abhi

vo khud nahin pa us ka bulava to hai abhi

manus ho chali hai udasi se zindagi

paanv ke ablon ka nazara to hai abhi

sach hai ki zahr-e-ishq talattuf gurez tha

chingariyon ne varna pukara to hai abhi

khvabon ko dar-ba-dar hi rakha tha nasib ne

ashuftagi men jaan ka khasara to hai abhi

maalum hai ki kuchh bhi nahin dasht-e-zist men

ummid-e-khvab hi pe guzara to hai abhi

rukhsat shab-e-firaq bahut sah liya tujhe

hamraz garche khvab sitara to hai abhi

be-tabiyan samet ke puchha kare hai dil

qismat men apni subh ka taara to hai abhi

More Poems

Leave a Comment