Subodh Lal Saqi
apni gumshudgi ki afvahen main phailata raha
jo bhi ḳhat aa.e bina khole hi lauTata raha
zehn ke jangal men ḳhud ko yuun bhi bhaTkata raha
uljhanen jo thiin nahin un ko hi suljhata raha
muskurahaT ki bhi aḳhir asliyat khul hi ga.i
gham zamane se chhupane ka maza jaata raha
aur rangin ho ga.i us ke tabassum ki dhanak
ishq ka suraj haya ki barf pighlata raha
mera chehra kho gaya chehron ke is bazar men
jaane kya kya ruup main duniya ko dikhlata raha
shahr ke chaurahe par paa.i thi us ne tarbiyat
umr bhar auron ke aage haath phailata raha
Leave a Reply