abbas-tabish

Koi Milta Nahin Ye Bojh Uthane Ke Liye

koi milta nahin ye bojh uthane ke liye

shaam bechain hai suraj ko girane ke liye

apne ham-zad darakhton men khada sochta huun

main to aaya tha inhen aag lagane ke liye

main ne to jism ki divar hi Dhaai hai faqat

qabr tak khodte hain log khazane ke liye

do palak biich kabhi raah na paai varna

main ne koshish to bahut ki nazar aane ke liye

lafz to lafz yahan dhuup nikal aati hai

teri avaz ki barish men nahane ke liye

kis tarah tark-e-taalluq ka main sochun ‘tabish’

haath ko katna padta hai chhudane ke liye

More Poems

Leave a Comment