Aankhon Ke Kashkol Shikasta Ho Jaenge Sham Ko

āñkhoñ ke kashkol shikasta ho jā.eñge shaam ko

din bhar chehre jam.a kiye haiñ kho jā.eñge shaam ko

saare peḌ safar meñ hoñge aur gharoñ ke sāmne

jitne peḌ haiñ utne saa.e lahrā.eñge shaam ko

din ke shor meñ shāmil shāyad koī tumhārī baat bhī ho

āvāzoñ ke uljhe dhāge suljhā.eñge shaam ko

shaam se pahle dard kī daulat maujeñ haiñ be-nām sī

dariyāoñ se mil ke dariyā bal khā.eñge shaam ko

sub.h se āñgan meñ āñdhī hai añdhiyārā hai dhuul hai

shāyad aag churāne vaale ghar ā.eñge shaam ko

Leave a Comment