aina dekhte hi vo divana ho gaya
dekha kise ki shama se parvana ho gaya
gul kar ke shama soe the ham na-murad aaj
raushan kisi ke aane se kashana ho gaya
divana qais pahle hamen chhedta raha
phir rafta rafta najd men yarana ho gaya
kaafi na mohr-e-khum ko hue lukka-ha-e-abr
ab is qadar vasia ye khum-khana ho gaya
hasil ba-ikhtisas hai us dil ko ye sharaf
kaaba bana kabhi kabhi but-khana ho gaya
laae chura ke bahar-e-parastish buton ko ghar
viran chaar rose men but-khana ho gaya
munh chuum luun ye kis ne kaha mujh ko dekh kar
divana tha hi aur bhi divana ho gaya
todi thi jis se tauba kisi ne hazar baar
afsos nazr-e-tauba vo paimana ho gaya
mai tauba ban ke aai thi lab tak ki ai ‘riyaz’
labrez apni umr ka paimana ho gaya
Leave a Reply