ba-nam-e-amn-o-aman kaun maara ja.ega
na jaane aaj yahan kaun maara ja.ega
liye hue hain sabhi apna sar hatheli par
kise ḳhabar hai kahan kaun maara ja.ega
ajiib ma.arka barpa hai, kuchh ḳhabar hi nahin
kise milegi amaan kaun maara ja.ega
namaz paḌhne ki mohlat mile, mile na mile!
na jaane vaqt-e-azan kaun maara ja.ega
jo tiir bhi hai, ita.at-guzar hai us ka
ye janti hai kaman kaun maara ja.ega
kiye ga.e hain jo itne hifazati iqdam
ye dekhna hai yahan kaun maara ja.ega
kisi ke lab pe ‘nasim’-e-sahar dua kaisi
yahi hai vird-e-zaban kaun maara ja.ega
Leave a Reply