Sadique Naseem
kis munh se zindagi ko vo raḳhshanda kah saken
jo mehr-o-mah ko bhi na tabinda kah saken
vo din bhi huun ghubar chhaTen andhiyan haTen
aur gul ko rang-o-bu ka numa.inda kah saken
taaza rakhen sada ḳhalish-e-zaḳhm ko ki ham
jo ab na kah sake kabhi a.inda kah saken
zindan men koi rauzan-e-zindan to ho ki log
jis haal men bhi dekhen hamen zinda kah saken
har shai badal rahi hai ajab ujlaton men rang
koi to naqsh ho jise pa.inda kah saken
dil ke siva hai kaun sa aisa charagh shaam
be-nur ho ke bhi jise raḳhshanda kah saken
sadiyon nava-garon ko mayassar na aa mile
vo giit jin ko hasrat-e-sazinda kah saken
is daur men har ik ko hai ḳhud apni justuju
koi nahin jise tira joinda kah saken
har su udaas chehre hain itne ki ab ‘nasim’
kis ko dayar-e-dard ka bashinda kah saken
Leave a Reply