ehsas-e-husn ban ke nazar men sama ga.e
go laakh duur the vo magar paas aa ga.e
ik raushni si dil men thi vo bhi nahin rahi
vo kya ga.e charagh-e-tamanna bujha ga.e
dair o haram hai aur to hasil na kuchh hua
sajde ghurur-e-ishq ki qimat ghaTa ga.e
tanha-ravi men yuun to musibat thi har qadam
ham ahl-e-karvan se to pichha chhuḌa ga.e
kitna fareb-kar hai ehsas-e-bandagi
ham manzil-e-ḳhudi se bahut duur aa ga.e
ulfat men fikr-e-zist nadamat ki baat thi
achchhe rahe jo jaan ki baazi laga ga.e
jo haal un ka tha vo hamin jante hain ‘arsh’
yuun vo hamari baat hansi men uḌa ga.e
Leave a Reply