khaksari se jo ghafil dil-e-ghammaz hua
khaak ke parde men poshida mira raaz hua
le gaya khat jo kabutar ki tarah tair-e-dil
zulf ke jaal men phanste hi girah-baz hua
saaz ke parde men ki tu ne hukumat sab par
nae qanun se tayyar tira saaz hua
hairati fasl-e-chaman men hui sarsabz aisi
sabza rukhsara-e-tasvir se aghaz hua
raat sharma ke tire balon se ru-posh hui
zagh-e-shab ke liye gesu par-e-parvaz hua
kothe par chehra-e-pur-nur dikhaya sar-e-sham
yaar se rajat-e-khurshid ka eajaz hua
chaman-e-dahr men the dida-e-unqa nargis
jab se main shefta-e-chashm-e-fusun-saz hua
sifat-e-abla mina-e-falak tuut gaya
kya qayamat tiri raftar ka andaz hua
jab hua mahv-e-ada baagh men vo khusrav-e-husn
phulon ke aks se gulgun faras-e-naz hua
aap munh dekhne ko aina-e-dil manga
tasfiya us but-e-kafir se khuda saaz hua
arsa-e-dahr men bandha jo tilism-e-ulfat
dushman-e-jan falak-e-shobada-pardaz hua
jaan leta hai tiri tir-e-nigah se sab ki
ai pari paik-e-qaza bhi qadar-andaz hua
sumbul-e-ah hua turra-e-shamshad-e-bahisht
ham-baghal mujh se jo vo sarv sar-afraz hua
us se kuchh kah ke mujhe zabh kiya baton men
tez-tar tegh-e-ajal se lab-e-ghammaz hua
log karte hain kamal-e-rukh-e-zeba ka vasf
khalq ko yaad tira mushaf-e-eajaz hua
ai mughanni dil-e-nadan nikal aaya bahar
aaj be-parda zamana men tira saaz hua
roz-e-furqat ne kiya tair-e-dil ko haijan
gul-e-khurshid mujhe jangal-e-shahbaz hua
bosa manga na gaya honton ka ai rashk-e-pari
rang missi ka mujhe surma-e-avaz hua
nashsha-e-ghamza-o-andaz se sarshar huun main
kasa-e-umr-e-ravan jam-e-mai-e-naz hua
tar-dimaghi jo badhe nashsha-e-maani ki ‘munir’
kasa-e-sar mujhe jam-e-mai-e-shiraz hua
Leave a Reply