nisbat hi kisi se hai na rakhte hain havale
haan ham ne jala Daale hain rishton ke qabale
be-ruh hain alfaz kahen bhi to kahen kya
hai kaun jo maani ke samundar ko khangale
jis samt bhi ja.un main bikhar jaane ka Dar hai
is ḳhauf-e-musalsal se mujhe kaun nikale
main dasht-e-tamanna men bas ik baar gai thi
us vaqt se riste hain mire paanv ke chhale
be-chehra sahi phir bhi haqiqat hai haqiqat
sikka to nahin hai jo koi is ko uchhale
‘sarvat’ ko andheron se Daraega koi kya
vo saath liye aai hai qadmon ke ujale