Wahshat Raza Ali Kalkatvi
zamin roi hamare haal par aur asman roya
hamari bekasi ko dekh kar saara jahan roya
main jab nikla chaman se shabnam ab-e-gulistan roya
udasi chha ga.i aisi ḳhud aḳhir baghban roya
na aaya rahm kuchh bhi aah dil men us sitamgar ke
hamari jab.ha-sa.i ke asar se astan roya
har ik azv-e-badan matam-kunan hai dil ke jaane se
hua yusuf jo gum to karvan ka karvan roya
ḳhalal-afgan tiri bazm-e-tarab men kaun ho zalim
hua kya gar tire kuche men koi tufta-e-jan roya
mire aansu tiri bedad ka parda na kholenge
abas ye bad-gumani hai main kab roya kahan roya
udu ḳhush hon to hon ai be-muravvat teri mahfil men
mira to haal ye hai jab kabhi aaya yahan roya
jafa-e-dushmanan aur bevafa.i-ha-e-yaran se
bahut gham-dida ho kar ‘vahshat’-e-azurda-jan roya
Leave a Reply