Hai Yaad Tujhse Mera Wo Sharh-E-Haal Dena

hai yaad tujh se mera vo sharh-e-hal dena

aur sun ke tera us ko hans hans ke taal dena

kar kar ke yaad us ki behal huun nihayat

fursat zara tu mujh ko tu ai khayal dena

us zulf-e-kaj ke uqde hargiz khule na mujh par

kyuun us ko shana kar ke ek ek baal dena

main muddaa ko apne mahmil kahun huun tujh se

gosh-e-dil apna idhar sahab-e-jamal dena

is umr bhar men tujh se manga hai ek bosa

khali pade na pyare mera saval dena

ham se rukhaiyan aur munh jhulse muddai ka

bosa pe bosa har dam duun be-saval dena

ya-rab kisi pe hargiz ashiq koi na ho jo

dil haath dilbaron ke hai bad-maal dena

vo mehrban ki ham ko altaf-e-bar-mahal se

paas apne se tha us ko uthne muhal dena

dekhe hai duur se to kahta hai be-muravvat

ye kaun aa ghusa hai is ko nikal dena

qaabu hai tera ‘hasrat’ mat chhod muddai ko

dushman ko maslahat niin hargiz majal dena

Leave a Comment