kya mita doge naam phulon ka
na karo qatl-e-am phulon ka
rang-o-bu ne bhi saath chhod diya
rafta rafta tamam phulon ka
gulistan ko farogh hoga magar
shart hai ehtiram phulon ka
ik na ik din hisab lena hai
baghban se tamam phulon ka
mausam-e-gul hai ye khizan to nahin
kyuun hai barham nizam phulon ka
ek do ka moamla to nahin
masala hai tamam phulon ka
bijliyan le rahi hain gin gin kar
ghaliban intiqam phulon ka
khun-e-nahaq hai ye are tauba
subh ghunchon ka shaam phulon ka
yuun jo murjha gae baghair khile
gham hai aise tamam phulon ka
hai sabhi ki nigah men ‘rumi’
aaj karb tamam phulon ka
Leave a Reply