na.e masiha banenge na.e laqab honge
hamare mulk men phir intiḳhab ab honge
suna hai phir se na.e ḳhvab beche ja.enge
suna hai phir se na.e jumle zer-e-lab honge
jo panch saal kabhi yaad tak nahin aa.e
vahi gharib vo lachar phir talab honge
lo phir se mandir-o-masjid ka jin nikal aaya
lo phir se rahnuma ab ḳhuun ke tishna-lab honge
chaman men bo to rahe ho tum intishar ke biij
is intishar ka lekin shikar sab honge
hamare mulk ka aa.iin ham se kahta hai
ab inqilab faqat vote ke sabab honge
‘shahab’ apne hi jin se na faizyab hue
tumhare aur mire gham-gusar kab honge
Leave a Reply