Ek Baat Par Bigde Gae Na Jo Umr-Bhar Mile

ik baat par bigde gae na jo umr-bhar mile

us se tariq sulh ke kya sulh-gar mile

baham suluk tha pa tire daur-husn men

ye rasm uth gai ki bashar se bashar mile

dil mahv-e-chashm-e-yar tha bimar ho gaya

kuchh un parstishon ka bhi akhir samar mile

ai naala tu ne saath diya aah ka to kya

ummid kya asar ki jo du be-asar mile

sadma jigar pe pahunche to ho dil men kyuun na dard

kya farq kuchh juda nahin hain dil jigar mile

ham ko hamare tal-e-bad ne Dubo diya

achchhe the gar nasib to kyuun chashm-e-tar mile

dhoun sad-ab-e-tegh se ai pamba jo kabhu

daman se tere daman dagh-e-jigar mile

ummid-e-bu men us ki mile yuun saba se ham

jis tarah be-khabar se koi be-khabar mile

jo kuchh na dekhna tha so vo dekhna pada

us bevafa se pahle the kya dekh kar mile

dekhe hunar jo apne hi vo jaane us ka kaam

ham ko to aib dekh ke apne hunar mile

mehr-e-jahan-faroz dikha duun jabin ko main

gar sang-e-astana-e-khairul-bashar mile

milne se us ki ghatti hai kya teri shan-e-husn

‘azurda’ khasta-jan bhi mile tu agar mile

Leave a Comment