Faraaz-E-Be-Khudi Se Tera Tishna-Lab Nahin Utra

Qateel Shifai

faraz-e-be-khudi se tera tishna-lab nahin utra

abhi tak us ki ankhon se khumar-e-shab nahin utra

zara main soch luun kya kaam us ko aa pada mujh se

kabhi vo bam-e-tanhai se be-matlab nahin utra

miri pursish ko aa pahuncha hasin banda koi varna

falak se aaj tak meri madad ko rab nahin utra

sitara sa nazar aata hai uupar se jahan paani

main khush-fahmi ke is gahre kuen men kab nahin utra

pashemani ke baad us ko giraun kaise nazron se

ki jab vo bevafa tha mere dil se tab nahin utra

kabhi sartaj mujh be-taj ko sahvan kaha us ne

abhi tak mere sar se nashsha-e-mansab nahin utra

tamanna hai ki chhedun naghma-e-insaniyat lekin

‘qatil’ ab tak mire aasab se mazhab nahin utra