Kabir Ajmal
vo ḳhvab talabgar-e-tamasha bhi nahin hai
kahte hain kisi ne use dekha bhi nahin hai
pahli si vo ḳhushbu-e-tamanna bhi nahin hai
is baar koi ḳhauf hava ka bhi nahin hai
us chand ki angḌa.i se raushan hain dar o baam
jo parda-e-shab-rang pe ubhra bhi nahin hai
kahte hain ki uThne ko hai ab rasm-e-mohabbat
aur is ke siva koi tamasha bhi nahin hai
is shahr ki pahchan thiin vo phuul si ankhen
ab yuun hai ki un ankhon ka charcha bhi nahin hai
kyuun baam pe avazon ka dhammal hai ‘ajmal’
is ghar pe to aaseb ka saaya bhi nahin hai
Leave a Reply