Ameeta Parsuram Meeta
mohabbat umr bhar ki ra.egan karna nahin achchha
sambhal ai dil ana ko asman karna nahin achchha
kuchh aise raaz hote hain bayan karna nahin achchha
har ik chehre ki sachcha.i ayaan karna nahin achchha
kisi nakam hasrat ki jo sulge aag siine men
hava yadon ki mat dena dhyan karna nahin achchha
chaman men huun to phir main bhi chaman ka ek hissa huun
taghaful itna mere baghban karna nahin achchha
hifazat se utaro ashk-e-gham ko dil ki siipi men
kisi qatre ko bahr-e-be-karan karna nahin achchha
ujale hi nahin hai tirgi bhi ziist ka hasil
ki in tarikiyon ko be-zaban karna nahin achchha
Leave a Reply