Mohabbat Umr Bhar Ki Raegan Karna Nahin Achchha

mohabbat umr bhar kī rā.egāñ karnā nahīñ achchhā

sambhal ai dil anā ko āsmāñ karnā nahīñ achchhā

kuchh aise raaz hote haiñ bayāñ karnā nahīñ achchhā

har ik chehre kī sachchā.ī ayaañ karnā nahīñ achchhā

kisī nākām hasrat kī jo sulge aag siine meñ

havā yādoñ kī mat denā dhyāñ karnā nahīñ achchhā

chaman meñ huuñ to phir maiñ bhī chaman kā ek hissa huuñ

taġhāful itnā mere bāġhbāñ karnā nahīñ achchhā

hifāzat se utāro ashk-e-ġham ko dil kī siipī meñ

kisī qatre ko bahr-e-be-karāñ karnā nahīñ achchhā

ujāle hī nahīñ hai tīrgī bhī ziist kā hāsil

ki in tārīkiyoñ ko be-zabāñ karnā nahīñ achchhā

Leave a Comment