vo kya likhta jise inkar karte bhi hijab aaya
javab-e-ḳhat nahin aaya to ye samjho javab aaya
qarib-e-sub.h ye kah kar ajal ne aankh jhapka di
are o hijr ke maare tujhe ab tak na ḳhvab aaya
dil is avaz ke sadqe ye mushkil men kaha kis ne
na ghabrana na ghabrana main aaya aur shitab aaya
koi qital-surat dekh li marne lage us par
ye maut ik ḳhushnuma parde men aa.i ya shabab aaya
purane ahd TuuTe ho ga.e paiman na.e qaa.em
bana di us ne duniya dusri jo inqalab aaya
guzargah-e-mohabbat ban ga.i ik mustaqil basti
laga kar aag aaya ghar ko jo ḳhana-ḳharab aaya
muamma ban gaya raz-e-mohabbat ‘arzu’ yunhi
vo mujh se puchhte jhijke mujhe kahte hijab aaya
Leave a Reply