zamin ki god men rakkhe hue aflak ke ḳhitte
sitare chumte hain sar-zamin-e-pak ke ḳhitte
koi tujh sa hasin duniya-e-rang-o-bu men kya hoga
ai meri jaan ke TukḌe ai meri ḳhaak ke ḳhitte
tiri tabindagi se meri peshani chamakti hai
tire ḳhvabon se raushan hain mire idrak ke ḳhitte
tire farsh-e-mohabbat par dilon ka raqs jaari hai
kahan tu aur kahan baaqi ḳhas-o-ḳhashak ke ḳhitte
ye meri fikr ke gauhar tiri miTTi ka tohfa hain
tire qurban ja.un ilm-o-istidrak ke ḳhitte
Leave a Reply