Suhail Kakorvi
hans diye zaḳhm-e-jigar jaise ki gul-ha-e-bahar
mujh pe maa.il hai bahut nargis-e-shahla-e-bahar
be-ḳhayali hai ḳhayal-e-ruḳh-e-zeba-e-bahar
bas yahi arzu-e-dil hai ki aa jaa.e bahar
mast in surḳh nazaron men nazar aa.e bahar
atish-e-soz-e-mohabbat se jo jal jaa.e bahar
misl-e-majnun nazar aaya mujhe sauda-e-bahar
saj ke aa.i hai mire samne laila-e-bahar
jab vo gulshan men sanvarti hai barasti hai sharab
jab vo bahke to zamane ko bhi bahka.e bahar
jhuum kar phuul ruḳh-e-yar pe hote hain fida
kaif-e-nazzargi-e-husn se lahra.e bahar
kashish-e-rang-e-mohabbat se vo aaya hai yahan
ai ḳhuda ab mire ghar se na kabhi jaa.e bahar
mo.ajiza main ne ye dekha tire lab par aksar
muskurahaT men nihan barq-e-tajalla-e-bahar
miri ankhon men utar aa.i hai tasvir tiri
meri ankhon se zara dekh tamasha-e-bahar
a.ina dil ka ‘suhail’ a.ina-e-shauq hai bas
us ki ma.asum nigahi se na sharma.e bahar
Leave a Reply