Ameeq Hanafi
dil hai viran bayaban ki tarah
gosha-e-shahr-e-ḳhamoshan ki tarah
haa.e vo jism tah-e-ḳhak hai aaj
jis ne rakkha tha hamen jaan ki tarah
sahab-e-ḳhana samajhte the jise
chal diya ghar se vo mehman ki tarah
chand suraj ka guman tha jis par
bujh gaya sham-e-shabistan ki tarah
saya-e-atifat ab sar pe nahin
saya-e-abr-e-gurezan ki tarah
hai agar apna muqaddar bhi to hai
tang bas tangi-e-daman ki tarah
Leave a Reply