Poet
rang jin ke mit gae hain un men yaar aane ko hai
dhuum hai pazhmurda phulon men bahar aane ko hai
yaar kuche men tire dhuni ramane ke liye
gham-zada hasrat-zada ik khaksar aane ko hai
rahm karna ab ki meri aankh khulne ki nahin
akhiri ghash mujh ko ai parvardigar aane ko hai
koi dam men hashr hoga kuchh khabar bhi hai tumhen
be-qarari laati hai ik be-qarar aane ko hai
bhage jaate hain bagule kanpta hai najd-e-qais
khaak udi kis ki yahan kis ka ghubar aane ko hai
hosh ude jaate hain yaaro ruuh hai sahmi hui
said-gah-e-ishq se kis ka shikar aane ko hai
jan-e-jan tu kiijo jan-bakhshi ki tujh ko dekhne
ek be-kas be-khud o be-ikhtiyar aane ko hai
dard-e-tanhai se chhudata hai aalam nazaa ka
be-qarari kuuch karti hai qarar aane ko hai
gul-rukhon ki bazm men jaane ko hai mera ghubar
peshvai ke liye abr-e-bahar aane ko hai
ab miri ankhon ko hoga valvala didar ka
hasrat in men aa chuki hai intizar aane ko hai
hogi ab arasta turbat shahid-e-naz ki
chadar-e-gul bichhti hai sham-e-mazar aane ko hai
be-vafa tum ba-vafa main dekhiye hota hai kya
ghaiz men aane ko tum ho mujh ko pyaar aane ko hai
ghuncha-o-gul kar rahi hain kyuun gareban chaak chaak
kaun se rashk-e-chaman ka dil-figar aane ko hai
hijr men dam ghutne ko hai kuuch hai tafrih ka
saans rukne ko hai hichki chand baar aane ko hai
baithi hai laila gareban phadne ke vaste
kis ke majnun ka libas-e-tar-tar aane ko hai
ghash se chaunko aankh kholo dam na todo ai ‘sharaf’
shukr ka sajda karo uth baitho yaar aane ko hai
Leave a Reply