mira ye zakhm siine ka kahin bharta hai siine se
lagae ai sanam jab tak na tu siine ko siine se
falak ne shadman dekha jise aaya usi ke sar
khuda mahfuz har insan ko rakkhe is kamine se
jo le jaate hain dil mera bachana thes se us ko
vo hai ai sang-dil nazuk zyada abgine se
na hogi duur ghash meri gulab-o-mushk-o-ambar se
mire rukh ko tu dho ai gul-badan apne pasine se
kahin ye saaf hota hai kudurat aur kiine se
agar zakhm-e-jigar mil bhi gaya dushman ke siine se
dil ik dahne raha gar dusra daaim raha baaen
na do baham hue dil go mila siina bhi siine se
koi ranj-o-alam aae na dil ke paas ai saaqi
jo ho aghaz-e-mai-noshi moharram ke mahine se
tu chahe dusron ko aur ham marte phiren tujh par
hamare vaste marna hai behtar aise jiine se
samajhna chahiye kiine se siina hai bhara us ka
kiya hai ‘mashriqi’ inkar jis ne mai ke piine se