Jab Aankh Band Hogi Didar Dekh Lenge

jab aañkh band hogī dīdār dekh leñge

kab tak chhupoge ham se ai yaar dekh leñge

khiḌkī qafas kī chāhe sayyād band kar de

ham rauzan-e-qafas se gulzār dekh leñge

vaa.iz na mai-kade meñ sheḳhī baghār aa kar

saaqī alag rahegā mai-ḳhvār dekh leñge

kūche meñ un butoñ ke ai ‘qadr’ phir phirā kar

ham qudrat-e-ḳhudā ke asrār dekh leñge

Leave a Comment