ab saliben shah-rahon par saja di ja.engi
aks rah ja.enge tasviren haTa di ja.engi
baat karne ko taras ja.enge arbab-e-vafa
bandishen itni zabanon par laga di ja.engi
jin kitabon men vafa ka zikr aa.ega nazar
sabr kiije vo kitaben bhi jala di ja.engi
aap aur tum ka tasavvur bhi fana ho ja.ega
jitni qadren hain adab ki sab miTa di ja.engi
muntazir rahiye mohabbat ka payambar aa.ega
jitni sham.en bujh chuki hain sab jala di ja.engi
pi rahe hain jin men ‘gauhar’ log insan ka lahu
aisi ta.amiron ki buniyaden hila di ja.engi
Leave a Reply